पत्रकार किशोर श्रेष्ठलाई पक्राउ नगर्न उच्च अदालत पाटनको अन्तरिम आदेश

काठमाडौं । जनआस्था साप्ताहिकका सम्पादक किशोर श्रेष्ठलाई तत्काल पक्राउ नगर्न उच्च अदालत पाटनले अन्तरिम आदेश जारी गरेको छ ।

न्यायाधीश अच्युत कुइकेलको इजलासले श्रेष्ठले दायर गरेको निषेधाज्ञासम्बन्धी निवेदनमाथि सुनुवाइ गर्दै यस्तो आदेश दिएको हो । अदालतले निवेदनको अन्तिम टुंगो नलागेसम्म श्रेष्ठलाई पक्राउ नगर्न जिल्ला प्रहरी परिसर, ललितपुरका नाममा आदेश जारी गरेको छ ।

अदालतले विपक्षी प्रहरीलाई लिखित जवाफ पेस गर्न १५ दिनको समयसमेत दिएको छ ।

श्रेष्ठविरुद्ध उपसभामुख रुवीकुमारी ठाकुरले जिल्ला प्रहरी परिसर ललितपुरमा उजुरी दिएपछि प्रहरीले उनलाई पक्राउ गर्ने प्रक्रिया अघि बढाएको थियो । त्यसविरुद्ध श्रेष्ठ अदालत पुगेका थिए ।
अदालतको अन्तरिम आदेशसँगै निवेदनको टुंगो नलागेसम्म श्रेष्ठलाई पक्राउ गर्ने प्रक्रिया रोकिएको छ ।