भोटेकोशी बाढीमा ४६९ जनाको मृत्यु, ९७७ अझै बेपत्ता

काठमाडौँ । रसुवामा भोटेकोशी नदीमा आएको विनाशकारी बाढीका कारण ज्यान गुमाउनेको संख्या ४ सय ६९ पुगेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अझै ९ सय ७७ जना बेपत्ता छन् ।

प्राधिकरणका कार्यकारी प्रमुख डा. धर्मराज उप्रेतीले शुक्रवार दिएको जानकारीअनुसार बाढी प्रभावित क्षेत्रबाट ३ हजार २५३ जनाको सकुशल उद्धार गरिएको छ । उद्धार गरिएकामध्ये बिहीबार मात्रै जलविद्युत् आयोजनाको सुरुङबाट ५ सय जनालाई बाहिर निकालिएको थियो ।

सुरुङमा अझै केही व्यक्ति फसेको हुनसक्ने भएकाले खोजी तथा उद्धार जारी रहेको उप्रेतीले बताए ।

बेपत्ताको खोजी र उद्धारलाई तीव्र बनाउन शुक्रवार बिहान तीनवटा हेलिकप्टर परिचालन गरिएको छ । सडक सम्पर्क विच्छेद भएका क्षेत्रमा राहत तथा खाद्यान्न पुर्‍याउन एक टनसम्म सामान बोक्न सक्ने ‘लिफ्टिङ ड्रोन’ समेत प्रयोग भइरहेको छ ।

नेपाली सेना र नेपाल प्रहरीका टोली उद्धार, शव व्यवस्थापन तथा प्रभावित क्षेत्रको अवस्था पहिचान गर्न विभिन्न स्थानमा खटिएका छन् ।

चितवनमा १७८ शव फेला

बाढीपछि विभिन्न जिल्लामा फेला परेका शवमध्ये सबैभन्दा धेरै चितवनमा छन् । प्राधिकरणका अनुसार चितवनमा १७८, नवलपरासी पूर्वमा ११०, गोरखामा ४४, नुवाकोटमा ३७, धादिङमा ३३, तनहुँमा २८, नवलपरासी पश्चिममा २७ र रसुवामा १२ जनाको शव फेला परेको छ ।

कतिपय स्थानमा शवको सट्टा मानव अंग मात्रै फेला परेकाले पहिचानमा समस्या भइरहेको प्राधिकरणले जनाएको छ ।

सुरक्षाकर्मी र कर्मचारीसमेत सम्पर्कविहीन

बेपत्ता हुनेमा सुरक्षाकर्मी र सरकारी कर्मचारी पनि छन् । नेपाली सेनाका ४५, नेपाल प्रहरीका २८ तथा सशस्त्र प्रहरीका १३ जना सम्पर्कविहीन रहेको विवरण छ ।

यस्तै, भन्सार कार्यालयका १५ र अध्यागमन कार्यालयका ४ जना कर्मचारीको अवस्था अज्ञात छ । सर्वसाधारणतर्फ रसुवाका १६१ र नुवाकोटका एक जना बेपत्ता रहेको प्राधिकरणले जनाएको छ ।

बाढीमा घाइते भएका ७३ जनाको विभिन्न अस्पतालमा उपचार भइरहेको छ । बेत्रावती क्षेत्रमा रहेका १७ घाइतेलाई तत्काल अक्सिजन आवश्यक परेकाले त्यसको व्यवस्था भइरहेको छ ।

सुरक्षित स्थानमा लैजाने प्रयास

उत्तरगया, डाँडागाउँ र किस्पाङ गाउँपालिकाको सीमा क्षेत्रमा करिब १ सय जना सुरक्षित अवस्थामा रहेका छन् । लिरिङ्गे स्कुलमा पनि करिब १५० जना सुरक्षित रहेको बताइएको छ ।

उनीहरूलाई त्रिशूली नदी पार गराएर सुरक्षित स्थानमा लैजाने काम भइरहेको छ । २१६ मेगावाट क्षमताको त्रिशूली जलविद्युत् आयोजनामा रहेका व्यक्तिका लागि खाद्यान्नको व्यवस्था गरिएको छ ।

प्राधिकरणले उद्धार, खोजी, राहत तथा शव व्यवस्थापनका लागि राज्यका सबै संयन्त्रलाई चौबीसै घण्टा परिचालन गरिएको जनाएको छ ।