सरकारका प्रवक्ता भन्छन्-तत्काल ठूलो जोखिम छैन्

काठमाडौँ । रसुवाको केरुङ क्षेत्रमाथि भोटेकोसीको माथिल्लो भागमा रहेका केही साना हिमताल फुटेकाले लेदोसहित नदीमा पानीको बहाव बढेको सरकारले जनाएको छ।

शुक्रबार मन्त्रिपरिषद् बैठकपछि सरकारका प्रवक्ता एवं शिक्षा तथा खेलकुदमन्त्री सस्मित पोखरेलले चीनसँग यस विषयमा निरन्तर संवाद भइरहेको बताए। चीनबाट प्राप्त जानकारीअनुसार तत्काल ठूलो जोखिम नरहेको उनको भनाइ छ।

उनले बाँध नफुटेको स्पष्ट पार्दै साना हिमताल फुटेकाले केही स्थानमा लेदोसहित पानीको बहाव बढेको बताए। तत्काल ठूलो विपद्को जोखिम नदेखिए पनि नदी किनारका बस्तीलाई उच्च सतर्कता अपनाउन सरकारले आग्रह गरेको छ।

सरकारले चीनबाट प्राप्त सूचनाका आधारमा अवस्थाको निरन्तर अनुगमन गरिरहेको र जोखिम न्यूनीकरणका लागि आवश्यक तयारी भइरहेको जनाएको छ।