पहिचान नखुलेका शव जंगलमा सुरक्षित गाडिँदै

काठमाडौं । भोटेकोशी बाढीपछि चितवनको नारायणी किनारमा भेटिएका पहिचान नखुलेका शव व्यवस्थापन गर्न थालिएको छ। हालसम्म २३३ शव भेटिएकामा पाँच जनाको मात्रै पहिचान खुलेको जनाइएको छ।

शव सडेर गन्हाउन थालेपछि संक्रमण र दुर्गन्धको जोखिमलाई मध्यनजर गर्दै जिल्ला सुरक्षा समितिको निर्णयअनुसार भरतपुर–१ रामनगर–देवघाट सडकखण्ड नजिकको जंगलमा खाडल खनेर शव सुरक्षित राखिने भएको हो।

सुरक्षाकर्मीको निगरानीमा तीनवटा ठूला खाडल तयार पारिएको छ। प्रत्येक शवलाई ‘डेड बडी ब्याग’मा राखी नम्बरयुक्त ट्यागसहित सुरक्षित गरिनेछ भने डीएनए नमुना पनि संरक्षण गरिने प्रहरीले जनाएको छ।

पछि आफन्तको डीएनएसँग नमुना मिलेमा कोड नम्बरका आधारमा शव निकालेर परिवारलाई जिम्मा लगाइनेछ।