महाकाली बढेपछि बनबासा पुलमा सवारी रोक

कञ्चनपुर । महाकाली नदीमा पानीको सतह बढेपछि नेपाल–भारत जोड्ने कञ्चनपुरको गड्डाचौकी नाकाबाट हुने आवागमन प्रभावित भएको छ। विशेषगरी चारपाङ्ग्रे सवारीसाधनलाई भारततर्फको शारदा ब्यारेज ९बनबासा पुल० बाट आवतजावत गर्न रोक लगाइएको छ।

इलाका प्रहरी कार्यालय गड्डाचौकीका अनुसार महाकाली नदीमा पानीको बहाव बढेर १ लाख १२ हजार क्युसेक पुगेपछि भारतीय पक्षले सुरक्षाका कारण चारपाङ्ग्रे सवारीसाधनको आवागमनमा रोक लगाएको हो।

इलाका प्रहरी कार्यालय गड्डाचौकीका प्रमुख प्रहरी वरिष्ठ नायब निरीक्षक जीवन गुरुङका अनुसार पहाडी क्षेत्रमा भइरहेको वर्षा र कञ्चनपुरमा पनि पानी परिरहेकाले नदीको बहाव अझ बढ्न सक्ने अवस्था छ।

उनले महाकालीमा पानीको बहाव १ लाख क्युसेकभन्दा माथि पुगेपछि बनबासा पुलमा ठूला सवारीसाधन सञ्चालन गर्न भारतीय पक्षले अनुमति नदिने बताए।

करिब एक सय वर्ष पुरानो बनबासा पुल जीर्ण अवस्थामा रहेकाले वर्षायाममा नदीको बहाव बढ्दा सुरक्षालाई ध्यानमा राखेर ठूला सवारीसाधनमा रोक लगाउने गरिएको छ।

ठूला सवारीसाधनको आवागमन रोकिए पनि मोटरसाइकल तथा पैदल यात्रुका लागि आवतजावत भने खुला रहेको प्रहरीले जनाएको छ। नदीको जलस्तर घट्दै गएपछि सवारी आवागमन पनि सामान्य हुने बताइएको छ।