भोटेकोशी बाढीमा फसेका सुदूरपश्चिमका १४६ जना अझै सम्पर्कविहीन

काठमाडौं । भदौ १० गते विहान करिब ९ बजे भोटेकोशी नदीमा आएको भीषण बाढीपछि सम्पर्कविहीन भएका सुदूरपश्चिमका एक सय ४६ जना अझै फेला परेका छैनन् । सुदूरपश्चिम प्रदेश प्रहरी कार्यालय धनगढीका अनुसार नौ जिल्लाका एक सय ४६ जना अझै सम्पर्कविहीन रहेका हुन् ।

प्रदेशभरका १८४ जना सम्पर्कविहीन भएका मध्ये ३८ जना परिवार र प्रहरीको सम्पर्कमा आइसकेका छन् । प्रदेश प्रहरी कार्यालयका प्रवक्ता प्रहरी वरिष्ठ उपरीक्षक पदमबहादुर बिष्टले सबैभन्दा बढी कैलालीका ८५ जना सम्पर्कविहीन भएका थिए । उनीहरुमा २५ जना परिवारको सम्पर्कमा आइसकेका छन् ।

यस्तै, कञ्चनपुरका ४६ जनामा १० जना सम्पर्कमा आएका छन् । बाजुराका १८ जनामा दुई र डडेल्धुराका १७ जनामा १ जना मात्रै सम्पर्कमा आएका छन् । एसएसपी बिष्टका अनुसार बैतडीका ८, दार्चुलाका चार तथा अछाम, बझाङ र डोटीका दुई–दुई जना अझै सम्पर्कविहीन छन् ।