उद्धारमा सरकार असफल भएको प्रचण्डको आरोप

काठमाडौं । नेपाली कम्युनिष्ट पार्टीका संयोजक पुष्पकमल प्रचण्डले भोटेकोशी बाढीमा फसेकाहरुको खोज तथा उद्धारमा सरकार असफल भएको आरोप लगाएका छन्।

संसद भवन बाहिर सञ्चारकर्मीसँग कुरा गर्दै प्रचण्डले विपद्को सुरुवाती चरणमा देखिएको सरकारी सक्रियता पछि कमजोर बनेको बताए। उद्धार कार्यले अपेक्षित परिणाम दिन नसकेको उनको भनाइ छ।

प्रधानमन्त्रीले संसदमा प्रस्तुत गरेका उद्धारसम्बन्धी केही विवरणसमेत गलत रहेको प्रचण्डले दाबी गरे। विशेषगरी उद्धार उपकरण, प्राविधिक जनशक्ति र सुरुङभित्रको अवस्थाबारे गलत सूचना दिइएको उनको आरोप थियो।

प्रचण्डले विपद्का बेला प्रधानमन्त्रीले सबै पक्षबीच समन्वय र सहकार्यको वातावरण बनाउनुपर्ने भए पनि वर्तमान नेतृत्व त्यसमा चुकेको टिप्पणी गरे।