मानव बेचबिखन रोक्न सबैको सक्रियता आवश्यक : मन्त्री बादी

काठमाडौं । महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्री सिता बादीले मानव बेचबिखन तथा ओसारपसार अन्त्यका लागि सरकारसँगै सुरक्षा निकाय, नागरिक समाज, सञ्चारमाध्यम र समुदायको संयुक्त प्रयास आवश्यक रहेको बताएकी छन् ।

मानव बेचबिखन तथा ओसारपसारविरुद्धको २० औँ राष्ट्रिय दिवसका अवसरमा सन्देश जारी गर्दै उनले प्रविधिको विकाससँगै बेचबिखनका नयाँ स्वरूप देखिन थालेकाले यसको सुरक्षित प्रयोग र जनचेतना अभिवृद्धिमा जोड दिइन् ।

मन्त्री बादीले मानव बेचबिखनविरुद्धको राष्ट्रिय नीति, २०८२ कार्यान्वयनमा आएको र नियन्त्रणसम्बन्धी ऐन संशोधनको विधेयक संसदमा विचाराधीन रहेको जानकारी दिइन् । विपद्का बेला विस्थापन, गरिबी र रोजगारीको अभावका कारण जोखिममा रहेका समुदाय बेचबिखनको चपेटामा पर्न सक्ने भन्दै उनले रोकथाम र संरक्षणमा थप प्रभावकारी पहल गर्न आग्रह गरिन् ।

भोटेकोशी बाढीमा ज्यान गुमाएकाहरूप्रति श्रद्धाञ्जली व्यक्त गर्दै उनले घाइतेको शीघ्र स्वास्थ्यलाभ तथा बेपत्ताको सकुशल उद्धारको कामना पनि गरेकी छन् ।