बजार अनुगमन प्रभावकारी हुन नसकेको सांसदको आरोप

काठमाडौं । नेपाली कांग्रेसका सांसद प्रकाश सिंह कार्कीले बजार अनुगमन र दोषीमाथिको कारबाही प्रभावकारी हुन नसकेको भन्दै सरकारको ध्यानाकर्षण गराएका छन् ।

नेपाल आर्थिक पत्रकार समाजले आयोजना गरेको कार्यक्रममा बोल्दै उनले चाडपर्वमा मात्रै बजार अनुगमन गर्ने प्रवृत्ति हटाएर वर्षभरि नियमित निगरानी गर्नुपर्ने बताए । नियामक निकायको सक्रियता कमजोर हुँदा उपभोक्ता निरन्तर मारमा परेको उनको भनाइ छ ।

सांसद कार्कीले ग्यासको आयात घटाउन विद्युतीय चुल्होको प्रयोगलाई प्रोत्साहन गर्नुपर्नेमा पनि जोड दिए । पर्याप्त विद्युत उत्पादन भइरहेका बेला सहुलियत र प्रोत्साहनमार्फत विद्युतीय उपकरणको प्रयोग बढाउन सके व्यापार घाटा घटाउन सहयोग पुग्ने उनले बताए ।

ग्यासका फरक–फरक ब्रान्डका सिलिन्डरका कारण उपभोक्तामाथि अतिरिक्त आर्थिक भार परेको उल्लेख गर्दै उनले ग्यास वितरण प्रणालीमा देखिएका समस्या समाधानका लागि दीर्घकालीन नीति आवश्यक रहेको बताए ।